Kryeprokurori i Shtetit, Aleksandër Lumezi ka thënë se Prokuroria e Shtetit nuk merret me akuzat politike. Ai këto komente i ka bërë për deputeten e Vetëvendosjes Drita Millaku e cila ngriti dyshime mbi përfshirjen e Presidentit, Hashim Thaçi dhe Kryeparlamentarit, Kadri Veseli në vrasjen e Komandant Drinit, raporton arbresh.info.

“Nëse ka zonja informacione lidhur me këto vrasje ajo duhet t’i deponojë në Prokurorinë e Shtetit, në prokurorinë kompetente, jo të del në foltoren e Kuvendit të Kosovës, akuzat dhe kundërakuzat politike të cilat bëhen në Kuvendin e Kosovës nuk janë bazë për fillimin e procedurës penale për prokurorë”, tha Lumezi në një interviste për RTK-në.

Drita Millaku i bëri komentet mbi vrasjen e Komandant Drinit dje gjatë seancës plenare të Kuvendit të Kosovës./arbresh.info/

(II) Po ashtu Lumezi ka folur edhe për Gjykatën Speciale. Ai ka treguar se në duart e Gjykatës Speciale tashmë janë një grumbull dosjesh. 

“Nuk mund të japim shumë informata se cilat dosje janë marrë nga Gjykata Speciale në Prokurorinë e Shtetit. As unë nuk kam informacione rreth këtyre rasteve dhe dosjeve”, ka thënë Lumezi në RTK.

Ai ka folur edhe për formimin e Gjykatës Speciale, e cila siç thotë ai, do të merret me hetimin e krimeve të luftës.

“Gjykata Speciale do të merret kryesisht me rastet e krimeve të luftës që janë kryer gjatë luftës në Kosovë”, ka thënë Lumezi.

“Këto hetime do të bëhen për të dy palët, për kosovarët dhe serbet. Unë mendojë se vendimet e Kuvendit të Kosovës për formimin e saj duhet të mbështetet”, është shprehur ai. /arbresh.info/